Myen hpyen dap ni laknak kaba gap bun ai majaw, mungshawa si hkala hkrum
Hpakant ginra hta gumshem Myen hpyen dap ni laknak kaba gap shadam bun ai majaw, mungshawa si hkala hkrum ai lam chye lu ai.
July shata 30 ya shana hkying 8:00pm jan aten daram hta Hpakant Byuha kawng kaw na gumshem Myen hpyen dap ni laknak kaba gap shadam bun ai majaw, mungshawa marai (1) asak si sum nna marai (2) hkala hkrum ai lam, ginra masha ni kaw na chye lu ai.
Gumshem Myen hpyen dap ni gap dat ai laknak kaba si, Lawnghkang mare na nta langai kaw wa hkrat kapaw ai majaw, hkan nu ni rai nga ai, kanu asak 37 ning asak si sum mat nna, num kasha asak 15 ning re hte la kasha asak 13 ning re hkan nau, hkala hkrum ai hta num kasha wa a lata maga mi hpe daw kau ra nna, la kasha wa mung hkala sawng ai re lam chye lu ai.
Hpakant ginra hta gumshem Myen hpyen dap ni gaw, gasat gala majan byin ai lam nnga ai shara hkan raitim, ndai zawn laknak kaba hte hkrup mara gap shadam bun ai lam, nbungli, drone ni hte mung hkrup mara gap gasat ai lam ni galaw nga ai majaw, mungshawa ni si hkala hkrum nga ai sha n-ga, dum nta ni mung hten za hkrum nga ai re.
