Hkawng Lang Hpu ginra gasat gala majan byin nga
Putao, Hkawng Lang Hpu ginra hta gasat gala majan byin nga ai lam chye lu ai.
July shata 23 ya shani, Hkawng Lang Hpu ginra hta KIA pawng hpawm hpyen hpung ni hte gumshem Myen hpyen dap, P.T.Ts pawng hpawm hpyen hpung ni gasat gala majan byin nga ai lam, lit nga ai salang ni kaw na chye lu ai.
Gasat gala majan byin nga ai hta gumshem Myen hpyen dap maga na si hkala sum machyi ai lam law nga ai hte KIA pawng hpawm hpyen hpung ni kawn, dap shara nkau hpe gasat zing madu la lu ai lam nga ai hpe chye lu ai.
Gumshem Myen hpyen dap ni gaw, Hkawng Lang Hpu ginra de hpyen n-gun, laknak arung arai htaw sa jat bang ai lam ding yang galaw nga ai sha n-ga, hpyen shamu shamawt htu shadut ai lam ni mung galaw nga ai majaw, gasat gala majan byin wa ai re lam chye lu ai.
Hpakant, KIA Masat (6) Dap Dung ginra hta mung, July shata 23 ya shana maga hkying 4:00pm aten daram hta gumshem Myen hpyen dap ni Jet nbungli hte bawm 2 lang wa gap gasat nna, jak sinat hte mung wa gap bun kau da ai lam na chye lu ai.
Ya bawm wa jahkrat gap gasat ai shara hta gaw gasat gala majan byin ai lam nnga ai kaw wa gap gasat ai rai nna, mungshawa hkra hkala ai lam nga nnga hte lawng lam hkum zup hpe matut sagawn nga ding yang re.
