Manmaw ginra hta Myen hpyen dap sanghpaw du wa ai kawn, gasat gala majan matut byin nga
Manmaw ginra hta gumshem Myen hpyen dap sanghpaw du wa ai kaw nna, gasat gala majan matut byin nga ai lam chye lu ai.
August shata praw 6 ya shani du hkra, Manmaw ginra gumshem Myen hpyen dap hpyen n-gun, laknak arung arai htaw lung wa ai, sanghpan ni du wa ai shani kaw nna, KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam, shawnglam lit nga ai salang ni kaw na chye lu ai.
KIA pawng hpawm hpyen hpung ni htim gasat zing madu la lu sai shara ni hta gumshem Myen hpyen dap ni, hpyen n-gun htun shadut ai lam galaw nga ai sha n-ga, nbungli ni hte mung gap gasat nga ai majaw, gasat gala majan matut byin nga ai lam chye lu ai.
Gumshem Myen hpyen dap ni gaw Manmaw ginra ntat sum hkra, ladat amyu myu hku nna ninghkap gasat nga ai rai nna, KIA pawng hpawm hpyen hpung ni mung htim gasat nga ding yang re ai lam chye lu ai.
Matut nna Hpakant ginra hta mung, August shata praw 5 ya shani Hpakant Byuha kawng kaw na gumshem Myen hpyen dap ni laknak kaba hkrup mara gap shadam bun ai majaw, mungshawa marai 3 asak si sum nna, marai 15 jan hkala hkrum ai lam chye lu ai.
Ya aten gumshem Myen hpyen dap gaw, Manmaw hte Hpakant ginra ni hta hpyen n-gun htu shadut htim gasat ai lam ding yang galaw nga ai sha n-ga nbungli, laknak kaba ni hte hkrup mara gap gasat nga ai majaw, mungshawa law law si hkala hkrum nga ai re.
