Kamaing hte Nam Ya lapran gasat gala majan laja nga
Hpakant de matut htu lung wa nga ai, gumshem Myen hpyen dap hte KIA ni Kamaing hte Nam Ya lapran kaw August shata 14 ya shani du hkra, gasat gala majan laja nga ai lam chye lu ai.
Kamaing maga na hpyen n-gun matut htu shadut lung wa nga ai gumshem Myen hpyen dap pawng hpawm hpyen hpung ni ya aten, Um Kahtawng hte Lagat Kawng kawn, Nam Ya maga de shamu shamawt htu shadut nga ai majaw, gasat gala majan byin nga ai (3) ya na wa sai lam, lit nga ai salang ni kaw na chye lu ai.
Gumshem Myen hpyen dap ni gaw, Hpakant ginra de hpyen n-gun htu shadut shamu shamawt nga ai hta gasat gala majan shani shagu ngu na byin nga ai rai nna, August shata 14 ya shani hta mung gumshem Myen hpyen dap ni drone hte bawm jahkrat gap gasat ai majaw, Hpakant mungshawa marai (5) hkala hkrum ai lam chye lu ai.
Manmaw ginra hta mung, gumshem Myen hpyen dap ni nbungli, drone ni hte shani shagu gap gasat nga ding yang rai nna, lagaw lam hku nna mung shamu shamawt htu shadut nga ai majaw, gasat gala majan matut byin nga ai lam chye lu ai.
