Myen hpyen dap ni laknak kaba gap shadam bun ai majaw, mungshawa hkala hkrum
Oplus_131072
Hpakant ginra hta gumshem Myen hpyen dap ni laknak kaba hkrup mara gap shadam bun ai majaw, mungshawa hkala hkrum ai lam chye lu ai.
August shata 18 ya shani hkying 10:00am jan aten daram hta Hpakant Byuha kawng kaw na gumshem Myen hpyen dap ni gasat gala majan byin ai lam nnga ai raitim, laknak kaba hkrup mara gap shadam bun ai majaw, mungshawa marai (3) hkala hkrum ai lam, ginra mungshawa ni kaw na chye lu ai.
Laknak kaba si Seng Tawng kyu hpyi bum hte 7 Stars Company lapran kaw langai, ရှမ်းကုန်း makau kaw langai wa hkrat kapaw ai majaw, ဒေါ်မြကြည် asak (85), ဒေါ် အေးအေးခိုက် asak (48) hte မမေကြယ်ဇင်မိုင် asak (15) ning re mungshawa ni hkala hkrum ai lam chye lu ai.
Gumshem Myen hpyen dap ni gaw, Hpakant ginra hta gasat gala majan byin ai lam nnga ai raitim, shani shagu ngu na laknak kaba, drone ni hte hkrup mara gap shadam bun ai majaw, mungshawa si hkala hkrum nga ai rai nna, hpyen n-gun htu shadut shamu shamawt ai lam ni ding yang galaw nga ai majaw, KIA ni hte gasat gala majan mung jahkring hkring ngu na byin nga ai lam chye lu ai.
