Myitkyina ginra kata lagut damya grau grau law wa
Myitkyina Muklum kata lagu lagut damya grau grau law wa nga ai lam chye lu ai.
September shata praw 7 ya shani hta mung, Myitkyina Jinghpaw lawk na nta langai kaw shang lagu nga ai asak 17 daram re ramma marai 3 hte asak 25 daram re ramma langai hpe lawk masha ni lu rim la ai lam, ginra masha ni kaw na chye lu ai.
Ya aten Myitkyina Muklum kata lagu lagut ai lam law nga ai rai nna, laiwa laisa mungshawa ni hpe jahkrit shama gumhpraw hkap gashun ai lam ni matut manoi byin nga ai sha n-ga, masha sat manghkang mung jahkring hkring ngu na byin nga ai re.
Matut nna Myitkyina ginra hta gumshem Myen hpyen balik dap ni modo, cycle laisin jep ai lam mung ding yang galaw nga ai rai nna, lu rim la ai modo cycle ni hpe gumhpraw dam law law shawa sha ai lam ni byin nga ai majaw, mungshawa ni machyi makaw rai wa yang tsi rung tsi jaw gawk sa na matut hte jawngma ni jawngsa jawngwa, hkawmsa hkawmwa lam shagu hta hkrit tsang let sha nga ra ai lam chye lu ai.
Ndai zawn byin ai lam gaw, laiwa sai 2021 ning hta Myen mungdan a daru magam ahkang aya hpe gumshem Myen hpyen dap ni zing madu la kau ai hpang kaw na, lani hte lani grau grau sawng wa nga ai re lam chye lu ai.
