Hpakant, Manmaw ginra ni hta gasat gala majan matut laja nga
Hpakant hte Manmaw ginra ni hta gasat gala majan matut manoi byin nga ai kaw, gumshem Myen hpyen dap ni laknak kaba hte hkrup mara gap shadam bun nga ai majaw, mungshawa si hkala hkrum nga ai lam chye lu ai.
September shata praw 9 ya jahpawt hkying 12:30am aten daram hta mung, Hpakant Byuha kawng na gumshem Myen hpyen dap ni laknak kaba hkrup mara gap shadam bun ai majaw, mungshawa marai (6) hta n yawm ai hkala hkrum nga ai rai nna, Manmaw ginra hta mung gasat gala majan matut manoi byin nga ai lam, shawnglam lit nga ai salang ni kaw na chye lu ai.
Majan laja nga ai kaw September shata praw 8 ya na Manmaw majan hta mung, gumshem Myen hpyen dap a hpri gang dap hpe KIA pawng hpawm hpyen hpung ni htim gasat ai kaw Myen hpyen dap maga si hkala law ai hte laknak arung arai ni hpe mung, KIA ni lu zing madu la lu ai sha n-ga, Hpakant Maw Tawng hte San Chyoi majan hta mung, gumshem Myen hpyen dap maga si hkala law ai lam chye lu ai.
Ya aten gumshem Myen hpyen dap ni gaw, Hpakant hte Manmaw ginra hpe bai jum tek lu na matu, ladat amyu myu hte htim gasat nga ai majaw, lahkawng maga hpyen masa shaja hkat nga ding yang re ai lam matut chye lu ai.
