Lamyang grup yin de gasat gala majan matut byin

Waimaw Lamyang grup yin de gumshem Myen hpyen dap hte P.T.Ts pawng hpawm hpyen hpung ni numdaw kalang bai, September shata praw 10 ya jahpawt kaw nna, KIA pawng hpawm hpyen hpung ni shara la nga ai, Lamyang mare de htu shadut wa ai majaw, laja lana gasat poi byin nga ai lam chye lu ai.

Gasat poi byin ai shara de Waimaw kaw dap jung tawn ai Hk.L.Y (58) kaw nna, laknak kaba hte gap bun ai sha n-ga nbungli, drone ni hte mung bawm jahkrat bun ai lam, shawnglam lit nga ai salang ni tsun ai.

Hpakant hte Manmaw hpyen man de mung, shani shagu ngu na gasat gala majan byin nga ai rai nna, gumshem Myen hpyen dap kawn nbungli, drone, laknak kaba ni hte hkrup mara gap bun ai majaw, mungshawa ni si hkala hkrum ai sha n-ga, dum nta hten za hkrum nga ai hte U, Wa yam nga ni mung si sum mat ai lam byin nga ai hpe chye lu ai.