Hpakant ginra gasat gala majan matut byin nga

Hpakant ginra hta KIA hte gumshem Myen hpyen dap ni gasat gala majan matut byin nga ai sha n-ga, gumshem Myen hpyen dap ni hpyen n-gun jat bang nga ding yang re ai lam chye lu ai.

September shata 15 ya shana hkying 8:00pm aten daram kaw nna, Hpakant Sharaw hka grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai hta Hpakant tatma kawng kaw nna mung, laknak kaba hkrup mara gap shadam bun nga ai lam, lit nga ai salang ni kaw na chye lu ai.

Gumshem Myen hpyen dap ni gaw, Hpakant ginra hpe bai jum tek lu na matu, ladat amyu myu hte htim gasat nga ai rai nna, September 15 ya shani hta mung, Hpakant de hpyen n-gun bai jat lung wa nga ai gumshem Myen hpyen dap hpyen modo (5), Nam Ya mare kaw du nga sai lam chye lu ai.

Manmaw hte Waimaw ginra ni hta mung, gumshem Myen hpyen dap ni hpyen n-gun htu shadut htim gasat ai lam ding yang galaw nga ai majaw, gasat gala majan shani shagu ngu na byin nga ai rai nna, gumshem Myen hpyen dap ni nbungli, drone, laknak kaba ni hte ding yang gap gasat nga ai lam matut chye lu ai.