Langse mare kaw nbungli bawm wa jahkrat bun ai majaw, mungshawa marai (2) asak si sum nna marai (4) hkala hkrum
Langse mare kaw gumshem Myen hpyen dap ni nbungli bawm wa jahkrat bun ai majaw, mungshawa marai (2) asak si sum mat nna marai (4) hkala hkrum ai lam chye lu ai.
September shata 22 ya shana maga hkying 2:25pm aten daram hta Mandalay Tada-U de na lung wa ai gumshem Myen hpyen dap Jet nbungli (2) kaw na langai gaw, majan byin nga ai Lahe Sin maga de bawm wa jahkrat bun nna, langai gaw Langse mare kaw wa jahkrat bun ai majaw, mungshawa La langai hte Num langai asak si sum mat nna, dum nta ni mung hten za mat ai lam, ginra masha ni kaw na chye lu ai.
Ya aten gasat gala majan byin nga ai shara gaw, Langse mare kaw na cycle hte sa yang hkying hkum (6) daram sa ra ai shara rai nna, Langse mare kaw gaw majan byin ai lam nnga ai kaw gumshem Myen hpyen dap ni mungshawa hpe gap masat tawn let wa gap gasat ai re lam chye lu ai.
