Nawng mi mare kaw Sam Hkyeng Pyi Tu Tsit ni hpyen dap jung hkyen ai majaw, mare masha ni hkrit tsang tsun garu nga

KIA Dap Ba ( 2 ) Dap Dung ( 14 ) uphkang ginra Nawngmi mare kata kaw Sam Hkyeng P.T.Ts ni dap jung na matu, mare uphkang rung makau kaw nhpan kum masat nga ai lam, dai buga na salang langai tsun ai kawn chye lu ai.

Sam Hkyeng P.T.Ts ni ya na zawn mare kata kaw dap jung shara jahkrat wa ai hpe n-galaw na matu asuya myonay ( ျမိဳ႕ နယ္ ) rung de du hkra laika bang da ai raitim n-madat ya ma ai, mare masha ni a shimlam kaw grai  hkra wa na masa pru ai, nga nna dai salang wa tsun ai.

October 18 ya shana hkying 10:00pm aten daram hta Nawngmi mare baw D.K.Ts ni a hkauna pa lam kaw bawm langai kapaw wa ai majaw, October 19 ya shani Nawngmi mare uphkang salang ni hte nawku hpung woi sara ni hpe shaga nna, ndai zawn manghkang matut byin wa jang mare machyi na re, shana hkying 6:00pm aten kawn pru hkawm ai lam tsep kawp n-galaw lu na, ngu tsun ai lam mung chye lu ai.