Sadung kaw nbungli bawm a majaw, mungshawa marai 8 asak si sum nna marai (5) hkala hkrum
Sadung mare kaw gumshem Myen hpyen dap ni nbungli bawm wa jahkrat bun ai majaw, mungshawa marai 8 asak si sum nna, marai (5) hkala hkrum ai lam chye lu ai.
September shata 29 ya shana maga hkying 2:30pm aten daram hta Sadung mare kaw gumshem Myen hpyen dap ni nbungli hte wa gap gasat ai majaw, jawngma ni hte mungshawa marai 8 asak si sum nhtawm, marai (5) hkala hkrum ai rai nna, dum nta ni mung hten za mat ai lam, ginra mungshawa ni kaw na chye lu ai.
Ya aten Sadung ginra hta gasat gala majan byin ai lam nnga ai kaw gumshem Myen hpyen dap ni gaw, mungshawa ni hpe gap masat tawn let wa gap gasat ai re lam, shawnglam na lit nga ai salang ni kaw na chye lu ai.
Dai ni hkying 12:10pm aten daram hta mung, Myitkyina kaw na lung wa ai Y-12 nbungli hte Langse ginra, Lahesin kaw bawm (6) lang wa gap gasat kau da ai lam nga ai, Manmaw hpyen man shara de mung Y-12 nbungli kaw nna, Ts.K.Hk (21) dap de shani shagu ngu na arung arai wa htaw jahkrat ya ai lam ni nga ai sha n-ga, Jet nbungli ni hte mung ding yang ngu na wa gap gasat ai lam ni nga ai hpe chye lu ai.
