Nsang Awng La gaw, Kadestam hpe round (2) hta htawng dang
Thailand Mungdan Bangkok Muklum hta October shata praw 4 ya jahpawt galaw ai, One Championship ginsup poi hta Wunpawng Fighter Nsang Awng La gaw, Sweden mungdan masha Kadestam hpe round (2) numdaw hta htawng dang la lu sai hpe chye lu ai.
Kadestam hte htawng ginsup na hte seng nna, shiga dap ni Nsang Awng La hpe san htai galaw ai hta ndai ginsup poi hpe kaja dik ai hku shaman da ai hte round (2) numdaw hta htawng dang lu na re lam tsun da ai hte maren, round (2) minute 2 jan hta ginsup tara agyi jahkring hte dang la lu sai re.
Nsang Awng La gaw, One Championship ginsup ai lam hpe hpang jahtum poi re nga nna tsun da ai. Ginsup wang de nnan shang wa ai kaw yu ngwi ninghkring Lay Phyu mung, shi a mahkawn hpe hkawn let Nsang Awng La hte rau pru wa ai hpe mu lu ai.
One Championship kaw Nsang Awng La gaw, (20) ning daram ginsup shingjawng wa ai hta One Championship Middle Weight World Champion hte One Light Heavy Weight World Champion a, shingkyit lahkawng hpe lu la ga sai rai nna, Nsang Awng La gaw asak (40) ning hta One Championship htawng ginsup poi kaw na pru hkring sa sai lam chye lu ai.
Nsang Awng La gaw, Wunpawng amyusha ni a matu arawng sadang hpe shatsaw ya ai hte kasi yu la hpa rai nga ai sha n-ga, Myen mungdan ting a arawng sadang hpe mung, Mungkan de htawng madun sharawt ya lu ai Fighter langai mung rai nga ai.
