Lamyang hte Hpakant ginra hta gasat gala majan laja lana byin
Waimaw Lamyang hte Hpakant ginra hta KIA pawng hpawm hpyen hpung ni hte gumshem Myen hpyen dap pawng hpawm hpyen hpung ni gasat gala majan laja lana byin nga ai lam chye lu ai.
October shata praw 6 ya shana maga hkying 2:00pm aten daram kaw nna, KIA pawng hpawm hpyen hpung ni shara la nga ai, Lamyang ginra de gumshem Myen hpyen dap hte P.T.Ts pawng hpawm hpyen hpung ni bai htu shadut wa ai majaw, gasat gala majan laja lana byin nga ai lam, shawnglam na lit nga ai salang ni tsun ai.
Gasat gala majan byin nga ai Lamyang maga de, Waimaw kaw dap jung nga ai Hk.L.Y (58) gumshem Myen hpyen dap kaw nna, laknak kaba hte gap bun ai sha n-ga, nbungli kaw nna mung Rocket hte wa gap gasat ai lam chye lu ai.
October shata praw 6 ya shani hkying 11:30am aten daram kaw nna, KIA pawng hpawm hpyen hpung ni shara la nga ai, Hpakant Malang Dung mare maga de gumshem Myen hpyen dap ni htu shadut wa ai majaw, gasat gala majan byin nga ai lam chye lu ai.
Manmaw hpyen man maga de mung, shani shagu ngu na gasat gala majan byin nga ai rai nna, gumshem Myen hpyen dap ni nbungli, drone, laknak kaba ni hte gap gasat nga ding yang re ai lam chye lu ai.
