57 ning hpring KIO masat ninghtoi hpe shagrau ai Golf gayet shingjawng hpaw hpawng galaw
Du wa na October 25 ya shani arng ai 57 ning hpring KIO masat ninghtoi hpe shagrau ai hku nna, Golf gayet shingjawng hpaw hpawng lamang hpe October 20 ya jahpawt hkying 8:00am aten hta Ja Htu Kawng Golf pa kaw galaw ai lam chye lu ai.
Ginsup shingjawng ai hpe lahkawng ya galaw na re. Group hku nna group 10, ginsup ai hta Dai Lawn Rung Dabang Pati ( A ) Dai Lawn Rung Dabang Pati ( B ) Ginjaw Rung Pati, Laiza Muklum Ramma, Nam Maling hte Grup Yin Gawnhkang Magam Dap, Ginjaw Sut Masa Magam Dap, Laiza Muklum Uphkang Rung, Ginjaw Hkamja Dap, Wun Awng Company, Mungchying Uphkang Dap ni rai nna, dinghkrai hku mung ginsup shingjawng lawm ai lam nga ai.
Ya na zawn lamang kaba hpe n-galaw lu ai ramram na mat sai, ya dai ning she bai lu galaw ai re. Lai wa sai shaning ni hta e, masa hta hkan nna, golf shingjawng poi ni galaw tim mung, kaji gachyaw rai na anhte kata kaw galaw ai lamang kasha ni sha lu galaw mat ai. Ya ndai lang gaw masha loi law rai ahkum ara Master Cup hku nna galaw lu ai re, nga nna Laiza Golf Club Captain Du Kaba Maran Zau Tawng tsun ai.
57 ning hpring KIO masat ninghtoi hpe shagrau ai, ginsup lamang hpan amyu myu ni hpe KIO uphkang ai ginwang ginjaw shagu hta mung galaw nga ai lam chye lu ai.
