Manmaw ginra hta gasat gala majan matut byin nga
KIA Masat (3) Dap Ba, Manmaw ginra hta KIA pawng hpawm ni hte gumshem Myen hpyen dap ni gasat gala majan matut byin nga ai lam chye lu ai.
October shata 10 ya jahpawt hkying 5:00am aten daram kaw nna, Manmaw hpyen man ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai hta gumshem Myen hpyen dap ni nga ai shara nkau hpe bai htim gasat la lu ai lam, shawnglam na lit nga ai salang ni tsun ai kaw na chye lu ai.
Gasat gala majan matut byin nga ai hta October shata praw 9 ya shani hta mung, Manmaw Deng (2, 3) na gumshem Myen hpyen dap ni nga ai shara (3) hpe KIA pawng hpawm hpyen hpung ni gasat zing la lu ai lam nga ai re.
Gasat gala majan laja nga ai Manmaw hpyen man ginra de, gumshem Myen hpyen dap ni nbungli, drone, laknak kaba ni hte shani shagu ngu na wa gap gasat nga ai hta KIA pawng hpawm hpyen hpung ni mung, laknak kaba, drone ni hte gap gasat nga ai lam chye lu ai.
Hpakant ginra Malang Dung mare grup yin kaw mung, October shata 10 ya jahpawt hkying 8:00am aten daram hta gumshem Myen hpyen dap ni Y-12 nbungli hte bawm 30 jan lang daram wa gap gasat ai kaw mungshawa hkra hkala ai nga nnga hpe nchye lu shi ai.
Hpakant Byuka kawng kaw nna mung, laknak kaba hte hkrup mara gap shadam bun ai lam ding yang galaw nga ai majaw, mungshawa hkrit tsang let nga ra ai lam, ginra mungshawa ni tsun ai kaw na chye lu ai.
