Nbungli bawm a majaw, mungshawa marai (1) asak si sum nna, marai (3) hkala hkrum
Oplus_131072
Langse mare kaw gumshem Myen hpyen dap ni nbungli bawm wa jahkrat bun ai majaw, mungshawa marai (1) asak si sum nna, marai (3) hkala hkrum ai lam chye lu ai.
October shata 10 ya shana daw hkying 3:20pm aten daram hta Myitkyina kaw na rawt lung wa ai Y-12 nbungli, Langse mare kaw bawm (4) lang wa jahkrat bun ai majaw, mungshawa marai (1) asak si sum mat nna, marai (3) hkala hkrum ai hta dum nta (2) mung hten za mat ai lam, ginra mungshawa ni kaw na chye lu ai.
Si hkala hkrum ai ni gaw, Salang Maran Zau La asak (40) ning (Sam mung) asak si sum mat nna, Salang Maw Maw asak (46) ning (Nmawk), Salang Htoi Nan Li Awng asak (28) ning (Myitkyina Dap Kawng) hte Salang La-gyawng Dau San asak (33) ning (Htaw Law mare) na mungshawa ni re lam chye lu ai.
Ya aten Langse makau grup yin hta gasat gala majan byin ai lam nnga ai kaw gumshem Myen hpyen dap ni gaw, mungshawa ni hpe gap masat tawn let wa gap gasat ai rai nna, Langse mare kaw wa gap gasat kau da ai hpang, Waimaw Lamyang hpyen man shara de mung, bai wa gap gasat ai lam chye lu ai.
Langse makau grum yin shara ni hta laiwa sai September shata 22 ya shani hta mung, gumshem Myen hpyen dap ni nbungli hte wa gap gasat ai majaw, mungshawa marai (3) asak si sum mat nna, marai (4) hkala hkrum ai lam ni byin lai wa sai re.
