Manmaw hpyen man de, gasat gala majan matut laja nga
Manmaw hpyen man Hkun Ta maga de, October shata 13 ya jahpawt hkying 5:30am aten daram kaw nna, gumshem Myen hpyen dap ni hpe KIA pawng hpawm hpyen hpung ni sa htim gap gasat ai kawn laja lana gasat gala majan byin ai lam chye lu ai.
Gasat gala majan byin ai makau grup yin shara ni hta gumshem Myen hpyen dap a, Jet nbungli hte bawm jahkrat gasat nna, gunship jak sanat hte mung gap dumbre kau da ai lam, shawng lam shiga lawk kaw na chye lu ai.
Manmaw hpyen man de KIA pawng hpawm hpyen hpung ni, September shata htum wa mahka kaw nna, gumshem Myen hpyen ni nga ai shara ni hpe numdaw kalang bai sa htim gasat ai hta shara nkau hpe gasat zingla lu ai lam nga ai re.
Ya aten Manmaw hpyen man, Waimaw Lamyang hpyen man, Hpakant hpyen man, Sagaing hte Jinghpaw mung jarit Bamauk hpyen man maga de, hpyen masa shaja hkat nga ai sha n-ga, shani shagu ngu na gasat gala majan byin nga ai lam chye lu ai.
Gasat gala majan kaw gumshem Myen hpyen dap maga sum machyi ai lam law wa jang, majan nbyin ai shara hkan na mungshawa ni hpawng chyawm ai nawku jawng, bunggyi jawng hte laika sharin jawng ni hpe gap masat tawn nhtawm, nbungli bawm jahkrat gasat wa ai majaw, seng ang ai salang ni kaw nna ntsa hpyen hpe sadi majan na lam tsun sadi jaw da ai hpe mung chye lu ai.
