Hpakant ginra hta gasat gala majan byin
Hpakant ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai lam chye lu ai.
November shata 25 ya shana hkying 7:00pm aten daram kaw nna, San Chyoi hte Sharaw Hka grup yin de gumshem Myen hpyen dap ni hpyen shamu shamawt htu shadut wa ai kaw na gasat gala majan byin wa ai re lam, lit nga ai salang ni tsun ai.
Gasat gala majan byin nga ai hta gumshem Myen hpyen dap gaw nbungli, drone, laknak kaba ni hte hkrup mara gap shadam bun ai majaw, mare kata hkan wa hkrat kapaw nna mungshawa hkra hkala ai hte dum nta htenza hkrum ai lam ni nga ai hpe chye lu ai.
Nbungli bawm gaw Kade Buga hpung up a nta hte Kade maw wan sat rung kaw wa hkrat kapaw ai majaw, dum nta ni htenza mat ai rai nna, wan sat rung na salang langai mung hkala hkrum ai re lam chye lu ai.
Hpakant ginra hta gumshem Myen hpyen dap ni ndai laman shawoi na hta grau hpyen shamu shamawt hkawm ai lam, nbungli, drone, laknak kaba ni hte hkrup mara gap gasat nga ai sha n-ga, Lamyang hte Manmaw ginra de mung hpyen shamu shamawt ai lam galaw nga ai majaw, shani shagu ngu na gasat gala majan byin nga ai hpe chye lu ai.
