Mogaung ginra hta KIA pawng hpawng ni hte gumshem Myen hpyen ni gasat gala majan laja nga
Mogaung mile 8 ginra hta KIA pawng hpawng hpyen hpung ni hte gumshem Myen hpyen ni gasat gala majan laja lana byin nga ai lam, shawng lam shiga lawk kaw na chye lu ai.
KIA pawng hpawm hpyen hpung ni shara la nga ai, Mogaung mile 8, Kawa Yang hte Pahuk Bum maga de gumshem Myen hpyen ni shamu shamawt htu shadut chyinglau shang wa ai majaw, December shata praw 6, bat hpang kru ya shani kaw nna, December shata praw 8 ya shani du hkra 3 ya laja lana gasat poi byin nga ai rai nna, ya ten dai majan byin nga ai mare kahtawng grup yin hkan na mungshawa masha ni, tinang shim lum dum ai shara de hprawng koi yen nga ai lam, shawng lam na lit nga ai salang ni kaw na chye lu ai.
December shata praw 7 ya shana hkying 10:30pm aten daram hta mung, Hpakant Marau Maw mare maga de, gumshem Myen hpyen dap ni drone bawm jahkrat majaw, mungshawa nta kaw hkrat kapaw nna, asak shata 7 sha re Ma a, kanu yan kawa asak si sum mat ai rai nna, dum nta mung hten za mat ai. Ma gaw asak naw hkrung ai lam, ginra shiga lawk kaw na mu chye lu ai.
Lai sai bat December shata praw 5 ya shana hta mung, Hpakant Tatma kawng kawn gumshem Myen pyen dap ni laknak kaba hkrup mara gap shadam ai majaw, Marau Maw mare kaw wa hkrat kapaw nna, mungshawa marai 4 hkala hkrum nhtawm, dinggai langai asak si sum mat ai lam ni byin sai re.
Manmaw hpyen man shara de mung, KIA pawng hpawm hpyen hpung ni hte gumshem Myen dap ni shani shagu ngu na laja lana gasat gala majan byin nga ai rai nna, gumshem Myen hpyen dap ni mung, shani shagu Ts.K.Hk (21) dap kata de Y-8 nbungli hte arung arai jahkrat ya nga ai sha n-ga, Jet nbungli hte KIA pawng hpawm ni nga ai shara grup yin de bawm jahkrat bun nga ding yang re lam, shawng lam na lit nga ai salang ni kaw na chye lu ai.
