Gumshem Myen hpyen ni Sadung maga de jet nbungli hte bawm matut wa jahkrat
Gumshem Myen hpyen dap ni gaw, gasat gala majan byin ai lam nnga ai Sadung maga de, December shata praw 9 ya shana maga hkying 2:30pm aten daram hta jet nbungli hte bawm wa jahkrat gasat ai lam chye lu ai.
Wu Lai mare makau na pawng hpawm shagyit (Gate) kaw gumhpem Myen hpyen ni jet nbungli hte bawm wa jahkrat gasat ai majaw, Shagyit ginsum hten za mat ai dai makau mungshawa nta langai mung shakum hten malawng mat ai, rocket sinat hte mung gayin gap kau da ai raitim, masha gaw hpa nra ai lam, lit nga ai salang ni kaw na chye lu ai.
Lai wa sai September shata 29 ya shana maga hkying 2:30pm aten daram hta mung, gasat gala majan byin ai lam nnga ai Sadung Mare gap pa kaw nbungli bawm wa jahkrat gasat ai majaw, mungshawa marai 8 asak si sum nna, marai 5 hkala hkrum ai lam byin sai re.
Ya aten Manmaw hpyen man hte Hpakant hpyen man shara ni hta shani shagu ngu na gasat gala majan byin nga ai rai nna, Waimaw Lamyang hpyen man shara de mung hpyen masa shaja hkat nga ding yang re lam, shawng lam na lit nga ai salang ni tsun ai kaw na chye lu ai.
