Masat (14) Dap Dung ginra gasat gala majan byin
KIA Masat (2) Dap Ba, Masat (14) Dap Dung ginra hta gasat gala majan byin ai lam chye lu ai.
December shata 24 ya jahpawt hkying 7:00am aten daram kaw nna, Masat (14) Dap Dung ginra de gumshem Myen hpyen dap hte Min Zay Thant P.T.Ts pawng hpawm hpyen hpung ni laknak kaba gap bun nna, lagaw lam hku nna mung htu shadut wa ai majaw, KIA pawng hpawm hpyen hpung ni hte gasat gala majan byin wa ai re lam, shawnglam lit nga ai salang ni tsun ai.
Gasat gala majan byin nga yang shana maga hkying 2:00pm aten daram hta Myitkyina kaw na rawt lung wa ai, gumshem Myen hpyen dap Jet nbungli (2) hte bawm wa jahkrat gap gasat ai lam chye lu ai.
Ya aten lahkawng maga hpyen masa shaja hkat nga ding yang rai nna, gumshem Myen hpyen dap maga na, Danai hte Awng Lawt hka lam hpe mung, December shata 24 ya shani kawn laiwa laisa mungshawa ni hpe aten nmasat hkum pat tawn da ai re lam chye lu ai.
KIA Masat (5) Dap Ba, Masat (3) Dap Dung ginra Gwi Rut Yang mare kaw mung, December shata 24 ya shani hkying 11:00am aten daram hta gumshem Myen hpyen dap ni nbungli hte bawm (2) lang wa jahkrat gap gasat ai majaw, mungshawa dum nta (3) hten za mat ai lam nga ai hpe chye lu ai.
Gumshem Myen hpyen dap gaw, gasat gala majan byin ai lam nnga ai shara hkan raitim, nbungli, drone, laknak kaba ni hte hkrup mara gap gasat ai lam galaw nga ai majaw, mungshawa law law si hkala hkrum nga ai hte dum nta ni mung hten za hkrum nga ai re.
