Manmaw majan kalang bai laja nga
KIA Masat (3) Dap Ba, Manmaw ginra hta gasat gala majan kalang bai laja nga ai lam chye lu ai.
December shata 25 ya jahpawt kaw nna, Manmaw ginra na gumshem Myen hpyen dap shara ni hpe bai lu la hkra, KIA pawng hpawm hpyen hpung ni kalang bai laja lana htim gasat nga ai lam, lit nga ai salang ni tsun ai.
Gasat gala majan laja lana byin nga ai hta gumshem Myen hpyen dap maga mung, nbungli, drone, laknak kaba hpan hkum hte ninghkap gasat nga ai rai nna, KIA pawng hpawm hpyen hpung ni mung htim gasat nga ding yang re ai lam chye lu ai.
Laiwa sai 2024 ning December shata praw 4 ya shani kaw nna, Manmaw ginra gasat gala majan byin ai laning mi jan wa sai hta KIA maga na dap shara law malawng hpe gasat zing madu la lu sai raitim, dap shara nkau hpe bai matut htim gasat nga ai hta ya aten lahkawng maga hpyen masa shaja hkat nga ding yang re ai lam chye lu ai.
