Mai Ja Yang hte Dum Bung lapran, masat da ai aten sha hkawmsa lu na lam ndau laika shapraw
Sinpraw Ginwang Ginjaw, Mai Ja Yang hte Dum Bung hka mahkrai lapran, masat da ai aten hta sha hkawmsa lu na lam ndau laika shapraw da ai hpe chye lu ai.
Mai Ja Yang hte Dum Bung hka lapran, concrete lam galaw hpang nga sai majaw, January shata praw 6 ya shani kaw nna hkrun lam hkawm mungshawa ni masat da ai aten hta sha hkawmsa lu na lam, Sinpraw Ginwang Ginjaw lam mahkrai gawgap makan dap kaw na ndau laika shapraw da ai re.
Masha htaw line modo ni gaw, jahpawt hkying 10:30am aten kawn 11:30am aten laman, shana de hkying 4:30pm aten kawn 6:30pm aten laman hkawmsa lu na hte ga sau htaw modo leng (4, 6) re ni gaw shani nlai lu na lam chye lu ai.
Shana ga sau nam hpun htaw lung wa ai modo ni gaw, shana hkying 7:00pm kawn hkying 11:00pm laman lai lu na, ga sau company (chang) hta nam hpun jahkrat ngut nna bai nhtang yu wa ai modo ni gaw, jahpawt hkying 1:00am kawn hkying 5:00am aten laman sha lai lu na hte leng (10, 12) modo ni hpe gaw, laiwa laisa hkum pat tawn da ai lam chye lu ai.
Hkawmsa hkawmwa kun rai htaw hpaga galaw ai mungshawa ni yawng mung, masat da ai aten ni hta hkawmsa lu na hte pat hkum tawn da ai modo ni gaw, lam mahkrai gawgap makan dap rung kaw nna mai lai sai lam ndau ai shani she hkawmsa lu na re lam chye lu ai.
