Manmaw ginra hta majan matut laja nga
Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam chye lu ai.
January shata 14 ya jahpawt hkying 6:00am aten daram kaw nna mung, Manmaw ginra na gumshem Myen hpyen dap shara ni hpe KIA pawng hpawm hpyen hpung ni bai matut htim gasat nga ai majaw, gasat gala majan matut byin nga ai lam, shawnglam lit nga ai salang ni tsun ai.
Laiwa sai December shata 25 ya shani kaw nna, KIA pawng hpawm hpyen hpung ni, Manmaw ginra na gumshem Myen hpyen dap shara ni hpe ninggam sharawt nna kalang bai htim gasat wa ai gaw, ya aten du hkra gasat gala majan matut byin nga ai re.
Gumshem Myen hpyen dap maga na mung, nbungli, drone, laknak kaba ni hte ladat hpan hkum ninghkap gap gasat nga ding yang re ai hpe chye lu ai.
Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai, laning mi jan sai hta KIA maga na dap shara law malawng hpe htim gasat zing madu la lu sai raitim, zep zi lu la hkra matut htim gasat nga ai hta lahkawng maga hpyen masa shaja hkat nga ding yang re ai hpe chye lu ai.
