Indawgyi ginra na tsi rung (2) hpe Myen hpyen dap ni nbungli hte gap gasat
Indawgyi ginra na tsi rung (2) hpe gumshem Myen hpyen dap ni nbungli hte gap gasat ai lam chye lu ai.
January shata 26 ya shani Indawgyi ginra, ချောင်းဝ hte တုံပင် tsi rung hpe gumshem Myen hpyen dap ni nbungli hte wa gap gasat ai majaw, tsi rung htenza mat ai rai nna, masha hkra hkala ai lam nga nnga nchye lu ai lam, ginra masha ni kaw na chye lu ai.
Indawgyi ginra gaw KIA pawng hpawm hpyen hpung ni hte gumshem Myen hpyen dap, Sam hkyeng P.T.Ts (SNA) pawng hpawm hpyen hpung ni lahkawng maga shara la nga ai rai nna, shani shagu ngu na gasat gala majan byin nga ai shara re ai hpe chye lu ai.
Hpakant ginra hta mung, January shata 25 ya shani Hpakant tatma kawng kaw nna gumshem Myen hpyen dap ni, mungshawa ni nga ai mare lawk de laknak kaba hkrum mara gap bun ai majaw, mungshawa marai 9 asak si sum mat ai lam chye lu ai.
Matut nna January shata 22 ya shani hta mung, gasat gala majan byin ai lam nnga ai, Kawng Ja mare kaw gumshem Myen hpyen dap ni nbungli hte wa gap gasat ai majaw, mungshawa marai 20 jan asak si sum mat nna marai 30 jan hkala hkrum ai lam ni byin wa sai re.
Gumshem Myen hpyen dap ni gaw lam shagu hta sum machyi nga sai majaw, ya na zawn gasat gala majan byin ai lam nnga ai shara hkan raitim, mungshawa ni hpe gap masat tawn let nbungli, drone, laknak kaba ni hte hkrum mara gap bun nga ai majaw, mungshawa dum nta law law htenza hkrum nna, mungshawa law law si hkala hkrum ai lam byin nga ai re.
