Laknak kaba si a majaw, mungshawa si hkala hkrum
Hpakant ginra hta gumshem Myen hpyen dap ni gap dat ai laknak kaba si wa hkrat kapaw ai majaw, mungshawa si hkala hkrum ai lam chye lu ai.
February shata praw 3 ya jahpawt hkying 5:00am aten daram hta Sut Bum mare kaw gumshem Myen hpyen dap ni gap dat ai laknak kaba si wa hkrat kapaw ai majaw, (2) ning re ma langai hte kanu yan kawa hkala hkrum ai lam, ginra masha ni kaw na chye lu ai.
Shani hkying 11:00am aten daram hta mung, Hpakant tatma kawng kaw na gumshem Myen hpyen dap ni gap dat ai laknak kaba si, Kalajawng makau kaw wa hkrat kapaw ai majaw, mungshawa marai (2) asak si sum mat nna, marai (14) hkala hkrum ai lam chye lu ai.
Matut nna February shata praw 2 ya shani hta mung, Hpakant tatma kawng kaw na gap dap ai laknak kaba si, Hpakant lahta tsang jawng kaw wa hkrat kapaw ai majaw, jawngma marai (2) hkala hkrum ai lam byin sai re.
Ya aten Hpakant ginra hta KIA pawng hpawng hpyen hpung ni hte gumshem Myen hpyen dap ni gasat gala majan byin nga ai hta lahkawng maga hpyen masa shaja hkat nga ding yang rai nna, gumshem Myen hpyen dap ni gaw, gasat gala majan nbyin ai shara hkan raitim, laknak kaba hkrup mara gap bun nga ai majaw, mungshawa si hkala hkrum ai lam byin nga ai hpe chye lu ai.
