Gumshem Myen hpyen dap ni, Laiza makau grup yin shara hte Masat (7) Dap Ba ginra ni de, nbungli drone ni hte gap gasat
Wunpawng Mungdan Shanglawt Hpung, Shanglawt Hpyen Dap Jung ai, Laiza Muklum makau grup yin shara hte KIA Masat (7) Dap Ba ginra de, February shata praw 5 ya shani gumshem Myen hpyen dap ni nbungli bawm, suicide drone ni hte gap gasat ai lam chye lu ai.
Februay shata praw 4 ya shana maga hkying 3:50pm aten daram hta Waimaw Muklum makau na Ja Lagat Yang (Shwe Nyaung Pin) mare kaw gumshem Myen hpyen ni nbungli bawm gap gasat ai majaw, mungmasha marai 1 asak si sum nna, marai 2 hkala hkrum nhtawm, mungshawa ni modo 15, cycle 1 hte gun rai ni htenza wan hkru mat ai lam, ginra shiga lawk kaw na chye lu ai.
Hkala hkrum ai mungshawa marai 2 hpe gaw, ni nawn ai tsi rung de tsi gawn lajang nga ai lam chye lu ai. Ya aten masha hpawng chyawm ai lam n-galaw na hte hkrun lam galu hkawm na rai yang shiga ni hpe atsawm sagawn nna she hkawmsa na lam, seng ang ai salang ni tsun da ai re.
Ya aten hta Manmaw hpyen man, Waimaw hpyen man hte Hpakant hpyen man shara ni de, KIA pawng hpawm hpyen hpung ni hte gumshem Myen hpyen ni shani shagu ngu na gasat gala majan byin nga ai hpe mung chye lu ai.
