Sasana shang 125 ning hpring Jubeli chyeju shakawn hpawng galaw
Myitkyina ginwang Jinghpaw Wungpawng hkalup hpung de sasana shang ai ( 125 ) ning hpring Jubeli chyeju shakawn hpawng kaba hpe, October 26 ya shani kaw nna October 29 ya shani du hkra, ginwang sasana hkalup Chyum Jawng wang hta galaw ai lam chye lu ai.
Mana gaw Myitkyina ginwang kata na buga 68 hte Gawrahka sasana, Myen sasana, Miwa sasana kaw na ni makun shat lit ( 137 ) sa gun jaw ai, shana na aten hta buga 13 kaw na kanu num ni hku nna mung ka hkrang lamang hte hkap tau hkalum ai lam chye lu ai.
Jubeli chyeju shakawn hpawng kaba hta Jubeli wunli manau mung nau ai. Nau hpaw nau gup lahkawng ya manau na re. Dai ni gaw mara raw wunli la akyu hpyi hpawng galaw ai. Dai na gaw sara kaba Geis du sa wa ai hpe gamung nau ra lamang galaw na re lam, Online TV lamang komiti malawm sara Latau Zau Lat tsun ai.
Hpawt na hte hpawt dit na gaw Galaxy Ster yu ngwi ninghkring Key kaw na mung sa du mahkawn shakawn na re, makum bu ai shana gaw Myitkyina ginwang ramma ni kaw nna yu ngwi pinra lamang kaba galaw na re. Ndai poi hta du sa na masha n-gun hkying manga hte hkying kru daram myit mada da ma ai, dai ni du hkra na masha jahpan gaw hkying masum jan rai sai nga sara tsun ai.
Sara kaba Geis gaw laiwa sai 1892 ning hta Myitkyina de du sa wa ai shaning hpe la ai rai nna, dai ning 2017 ning hta gaw 125 ning hpring ai Jubeli chyeju shakawn hpawng kaba rai nga ai lam chye lu ai.
