Hpakant Mashi Kahtawng makau kaw gasat gala majan matut laja nga
KIA Masat (9) Dap Ba, Masat (6) Dap Dung ginra, Mashi Kahtawng akyu hpyi bum mayan kaw, February shata praw 6 ya shani gumshem Myen hpyen dap hte KIA pawng hpawm hpyen hpung ni gasat gala majan matut laja nga ai lam chye lu ai.
“Dai hpawt hkying 8:00am aten daram kaw nna, Myen hpyen ni tinang KIA pawng hpawm hpyen hpung ni shara la nga ai, Mashi Kahtawng akyu hpyi bum maga de numdaw kalang bai htu shadut lung wa ai majaw sharaw wan hkru ai zawn nga hkra gasat poi byin nga ma ai. Hkying 3:00pm aten daram kaw nna Myen hpyen ni numdaw lahkawng lang bai htim gasat nga masai” nga nna Hpakant ginra na salang langai tsun ai.
Ya gasat poi byin nga ai shara hpe lai wa sai January shata 31, bang hpang 6 ya shani kaw nna, KIA pawng hpawm hpyen hpung ni shara la nga ai ten gumshem Myen hpyen dap ni htu shadut lung wa ai majaw gasat gala majan byin wa ai re lam, shawng lam na lit nga ai salang ni tsun ai kaw na chye lu ai.
Ndai shara hpe lu la na matu gumshem Myen hpyen dap gaw, nbungli hte mung wa gap gasat ai rai nna, Hpakant Dapnu kawng kaw nna, laknak kaba, drone ni hte hkrup mara gap bun ai majaw, mungshawa ni si hkala hkrum ai sha n-ga, dum nta ni mung htenza mat ai lam nga ai hpe chye lu ai.
