Myen hpyen dap ni nbungli hte gap gasat ai lam ading ding galaw nga
Gumshem Myen hpyen dap ni gasat gala majan byin ai lam nnga ai shara hkan raitim, nbungli hte gap gasat ai lam ading ding galaw nga ai hpe chye lu ai.
February shata 21 ya shani, KIA Masat (2, 3, 8, 9) Dap Ba girna ni hta gumshem Myen hpyen dap ni gasat gala majan byin ai lam nnga ai raitim, nbungli hte wa gap gasat ai lam, lit nga ai salang ni kaw na chye lu ai.
Masat (2) Dap Ba, Masat (11) Dap Dung ginra hta shani hkying 1:30pm aten daram hta bawm (5) lang, Masat (3) Dap Ba ginra Sadung mare kaw shana daw hkying 5:50pm aten daram hta bawm (2) lang, Nba Pa mare kaw shana daw hkying 3:15pm aten daram hta bawm (1) lang, Masat 8 Dap Ba ginra Htai Ya Yang kaw shani hkying 11:40am aten daram hta bawm (2) lang, Masat (9) Dap Ba ginra kaw shani hkying 10:00am aten daram hta bawm (4) lang wa jahkrat bun ai re lam chye lu ai.
Bawm wa jahkrat bun ai hta mungshawa dum nta ni htenza mat ai lam nga ai rai nna, kade ram htenza mat ai hte mungshawa si hkala hkrum ai lam nga nnga hpe matut sagawn nga ding yang re.
Ya aten gumshem Myen hpyen dap ni gaw, lam shagu hta sum machyi nga sai majaw, nbungli hpe madung jai lang let gasat gala majan byin ai lam nnga ai shara hkan raitim, mungshawa ni hpe gap masat tawn let hkrup mara gap gasat ai lam, ading ding galaw nga ai hpe chye lu ai.
