Nbungli bawm a majaw mungshawa asak si sum
KIA Masat (3) Dap Ba ginra gumshem Myen hpyen dap ni nbungli hte wa gap gasat ai majaw, mungshawa asak si sum ai lam chye lu ai.
February shata 22 ya shana hkying 11:20pm aten daram hta Munghka Pa Ninghtawn, Nhkawng Pa mare, Bum Kahtawng kaw gumshem Myen hpyen dap ni nbungli hte wa gap gasat ai majaw, mungshawa marai (1) asak si sum mat ai lam, ginra masha ni tsun ai.
Nbungli bawm, Salang Nhkum Zau Tawng a dum nta kaw wa hkrat kapaw ai majaw, Salang Nhkum Zau Tawng asak (78) ning asak si sum mat ai rai nna, dum nta mung hten za hkrum mat ai re lam chye lu ai.
Ya bawm wa jahkrat gap gasat ai shara gaw, gasat gala majan byin ai lam nnga ai, mungshawa ni hkrai nga ai mare kahtawng rai nna, gumshem Myen hpyen dap ni mungshawa hpe gap masat tawn let, wa gap gasat ai re lam chye lu ai.
