Myen hpyen dap ni nbungli hpe madung dat, gap gasat ai lam galaw nga
Gumshem Myen hpyen dap ni gaw nbungli hpe madung dat let, gasat gala majan byin ai lam nnga ai shara hkan raitim, gap gasat ai lam shani shagu galaw nga ai hpe chye lu ai.
February shata 24 ya jahpawt hkying 9:00am aten hte hkying 10:00am aten laman, KIA Masat (2) Dap Ba, Masat (14) Dap Dung ginra hta gumshem Myen hpyen dap ni nbungli bawm (10) jan lang wa jahkrat bun ai lam, lit nga ai salang ni tsun ai.
Hpakant Mawmau Bum kaw mung, dai hpawt jau hkying 1:00am aten daram hta nbungli bawm wa jahkrat bun ai majaw, mungshawa dum nta (5) hten za mat ai rai nna, mungshawa hkra hkala ai lam nnga ai hpe chye lu ai.
February shata 23 ya shani hta mung, KIO Ginjaw Ginra rai nga ai Laja Yang mare kaw nbungli bawm wa jahkrat bun ai majaw, mungshawa dum nta hten za mat ai lam nga ai re.
Ya aten gumshem Myen hpyen dap ni gaw KIO Ginjaw Ginra, KIO uphkang ginra hte jarit mayan shara ni hta nbungli hte shani shagu ngu na wa gap gasat ai lam ni galaw nga ai majaw, mungshawa si hkala hkrum nga ai hte dum nta ni mung hten za hkrum nga ai re.
