Myi hprap wan nlu ai majaw, mungshawa ni yakhkak hkrum nga
Myitkyina Muklum kata ya aten myi hprap wan ding yang nlu ai majaw, mungshawa ni lam amyu myu hta yakhkak hkrum nga ai lam chye lu ai.
Myi hprap wan nlu ai majaw, jawngma ni hte EV modo, cycle jawn ai mungshawa ni, myi hprap wan hpe madung jai lang nna kan bau bungli galaw nga ai mungshawa ni, myi hprap wan ding yang nlu ai majaw, lam amyu myu hta yakhkak hkrum nga ai lam, ginra masha ni kaw na chye lu ai.
Myi hprap wan hpe aten masat nna jaw ai 2, 3 ya wan nsa mat ai lam ni mung nga ai, wan sa wa ai aten hta raitim, lani mi hkying hkum 2 jan daram sha jaw ai, nkau mungshawa ni gaw wan jak hte solar hpe jai lang ai lam ni nga ai raitim, jak sau manu rawt tsaw ai lam, solar wan n-gun ndang ai lam ni byin nga ai rai nna wan jak, solar nlu ai mungshawa ni gaw, phone wan bang la na matu pi yakhkak nga ai lam, ginra masha ni matut tsun ai kaw nga chye lu ai.
Muklum kata mungshawa ni nga ai shara hkan wan ding yang nlu ai raitim, gumshem Myen hpyen dap magam gun ni nga ai nta, rung hkan gaw aten hpring wan jaw ai lam ni nga ai hpe chye lu ai.
Laiwa sai shaning hkan mung, myi hprap wan ding yang nlu ai lam ni nga ai raitim, dai ning gaw shawoi shaning na hta grau myi hprap wa nlu ai lam grau sawng wa ai re lam chye lu ai.
