TNLA hte MNDAA ni gasat gala majan byin
Kutkai mare kaw Ta-ang (TNLA) hte Kokang (MNDAA) hpyen hpung ni gasat gala majan byin nga ai lam chye lu ai.
March shata 14 ya jahpawt hkying 10:00am aten daram kaw nna, Kutkai ginra kaw TNLA hte MNDAA hpyen hpung ni gasat gala majan byin nga ai lam, ginra masha ni tsun ai.
Kutkai ginra kata TNLA hpyen hpung ni shara la nga ai dap shara ni hpe MNDAA hpyen hpung ni kawn, n-gun kaba hte shawng sa htim wang gap wa ai kaw na, gasat gala majan byin wa ai re lam chye lu ai.
Gasat gala majan byin nga ai hta lahkawng maga, drone, laknak kaba ni hte gap gasat nga ai majaw, mungshawa ni nga ai shara ni hkan wa hkrat kapaw ai lam nga ai hpe chye lu ai.
Ndai zawn drone, laknak kaba si ni wa hkrat kapaw ai majaw, mungshawa hkra hkala ai hte dum nta hten za mat ai lam ni nga ai raitim, marai kade hkra hkala ai hte dum nta kade hten za mat ai lam nchye lu ai rai nna, ya aten lahkawng maga hpyen masa shaja hkat nga ding yang re ai lam chye lu ai.
