Ga shingbut gyi ru wa ai majaw, mungshawa gyi kaput hkrum

Hpakant ginra lung seng maw langai kaw ga shingbut gyi ru wa ai majaw, mungshawa gyi kaput hkrum ai lam chye lu ai.

March shata 17 ya shana daw hkying 3:30pm aten daram hta Hpakant Mawsiza lung seng maw kaw ga shingbut gyi ru wa ai majaw, mungshawa marai 5 yawm htum gyi kaput lawm mat ai lam, ginra masha ni tsun ai.

Ga shingbut gyi kaput lawm mat ai mungshawa ni hpe seng ang ai ni kawn hkye mawoi ai lam galaw nga ai, yawng marai kade gyi kaput lawm mat ai tup hkrak nchye lu shi ai nga nna, ginra masha ni matut tsun ai.

Hpakant ginra hta ya na zawn ga shingbut jahkring hkring ngu na gyi ru ai lam ni a majaw, mungshawa law law si hkala hkrum ai lam ni byin nga ai re.