Drone bawm a majaw, mungshawa si hkala hkrum
Hpakant ginra hta drone bawm wa hkrat kapaw ai majaw, mungshawa si hkala hkrum ai lam chye lu ai.
May shata 17 ya shani hkying 12:15pm aten daram hta Hpakant Lawnghkang lawk (4) na nta langai kaw drone bawm wa hkrat kapaw ai majaw, mungshawa marai (3) asak si sum mat nna, marai (2) hkala hkrum ai hte dum nta mung hten za mat ai re lam, ginra masha ni tsun ai.
Gumshem Myen hpyen dap a drone bawm wa hkrat kapaw ai majaw, mungshawa marai (3) asak si sum mat nna marai (2) hkala hkrum ai , dum nta mung wan hkru hten za mat ai, hkala hkrum ai yan hpe gaw ginra masha ni hte garum kahtau hpung ni kawn, tsi rung de wa htaw sa da sai lam, ginra masha ni matut tsun ai.
Hpakant ginra hta ya aten gumshem Myen hpyen dap ni hpyen n-gun htu shadut jat bang ai lam ding yang galaw nga ai rai nna, KIA pawng hpawm hpyen hpung ni hte mung gasat gala majan byin nga ai hta gumshem Myen hpyen dap gaw, gasat gala majan nbyin ai shara hkan raitim, drone, laknak kaba ni hte hkrup mara gap shadam bun ai lam galaw nga ai majaw, mungshawa si hkala hkrum nga ai hte dum nta ni mung hten za hkrum nga ai re.
