Shwegu ginra gasat gala majan matut manoi byin nga
KIA Masat (11) Dap Ba, Masat (12) Dap Dung, Shwegu ginra hta gasat gala majan matut manoi byin nga ai lam chye lu ai.
June shata praw 3 ya jahpawt hkying 5:30am aten daram kaw nna, Shwegu ginra Lam Braw Yang mare kaw KIA pawng hpawm hpawm hpyen hpung ni hte gumshem Myen hpyen dap ni gasat gala majan matut byin nga ai lam chye lu ai.
Gumshem Myen hpyen dap Hk.M.Y (378-416-602), Hk.L.Y (56), T.M (88) dap kata na pawng hpawm hpyen hpung ni, Lam Braw Yang mare kaw lagaw lam hku nna htu shadut lung wa ai hpe KIA pawng hpawm hpyen hpung ni hkap gap gasat ai kawn, gasat gala majan byin wa ai re lam chye lu ai.
Shwegu ginra hta ya aten shani shagu ngu na gasat gala majan byin nga ai hta gumshem Myen hpyen dap kawn nbungli, drone, laknak kaba ni hte gap gasat ai lam mung, ding yang galaw nga ai re hpe chye lu ai.
