Ga sharut gyi ai majaw mungshawa asak si sum
Hpakant ginra na lung seng company langai kaw ga sharut gyi ru wa ai majaw, mungshawa asak si sum ai lam chye lu ai.
July shata praw 3 ya jahpawt Hpakant, Seng Tawng Kawng San mare na, Sein Long Taung Tan lung seng company kaw ga sharut gyi ru wa ai majaw, dai kaw bungli galaw nga ai bungli masha marai (6) asak si sum mat ai lam, ginra masha ni kaw na chye lu ai.
Yi nam ta re ai majaw marang htu sawng nna ga shingbut gyi ru wa ai kaw bungli galaw masha ni kaput lawm mat nna asak si sum mat ai re lam chye lu ai.
Laiwa sai June shata 28 ya shani hta mung, Hpakant Nam Maw mare makau kaw ga shingbut gyi ru wa ai majaw, lung seng tam hkawm ai mungshawa marai (6) asak si sum ai lam ni byin lai wa sai re.
Hpakant ginra hta gaw yi nam ta aten ladaw hta marang htu sawng nna, ga shingbut gyi ai lam ni jahkring hkring byin nga ai majaw, lung seng bungli galaw ai mungshawa ni asak si sum, hkala hkrum ai lam ni mung, jahkring hkring byin nga ai hpe chye lu ai.
