Hkawng Lang Hpu ginra de Myen hpyen dap ni hpyen n-gun, malu masha jat bang ai lam galaw nga

Putao, Hkawng Lang Hpu ginra de gumshem Myen hpyen dap ni hpyen n-gun hte hpyen lang arung arai malu masha ni jat, jahting bang ai lam galaw nga ai hpe chye lu ai.

Hkawng Lang Hpu ginra de gumshem Myen hpyen dap ni hpyen n-gun hte hpyen lang arung arai malu masha ni jat, jahting bang nga ai sha n-ga, mare kata hpyen lahkawng ai lam, mungshawa ni hpe san jep rim adup ai lam ni galaw nga ai majaw, mungshawa ni hkawmsa hkawmwa lam hta sadi maja na hkawmsa ra ai lam, ginra masha ni tsun ai.

Hkawng Lang Hpu ginra de gumshem Myen hpyen dap ni, kun rai hte malu masha tsi mawan ni nhtaw shalai shangun ai majaw, kun rai dum hprut wa ai lam, kun rai manu rawt tsaw wa ai lam ni byin nga ai majaw, mungshawa ni lam amyu myu yakhkak hkrum nga ai hpe chye lu ai.

Matut nna Shwegu hte Manmaw ginra ni hta mung, gasat gala majan shani shagu ngu na byin nga ai sha n-ga, gumshem Myen hpyen dap ni hpyen n-gun, hpyen lang arung arai hte malu masha ni jat, jahting bang ai lam ni ding yang galaw nga ai hpe chye lu ai.