SNA P.T.Ts ni mungshawa marai (30) daram hpe rim woi mat
Mogaung Sarmaw mare kaw SNA P.T.Ts hpyen hpung ni mungshawa marai (30) daram hpe rim woi mat ai lam chye lu ai.
July shata praw 8 ya shana daw hkying 5:00pm jan aten daram hta Sam Hkyeng (SNA) P.T.Ts hpyen hpung ni, Sarmaw KBC nawku jawng wang, Kawa Yang hte Galale Pat Jasan Jawng wang shara (3) kaw na mungshawa marai 30 daram hpe mara kata rim woi mat wa ai lam, ginra masha ni tsun ai.
Nawku jawng wang kata nawku hpung woi sara ni ramma ni ka din gin sup nga ai, kanu num ni gaw lu sha gam akyu hpyi nga ai, jawngma ni mung wa gin sup nga ai, akyu hpyi gawk gap ai ta sama sara ni, gaw gap hpa-awn ni yawng nga taw ai kaw ndum shami a kajawng shang wa nna, yawng hpe modo (2) kaw rim woi mat wa ai re lam, ginra masha langai matut tsun ai.
Rim woi mat ai hta ma kaji jawngma nkau hpe gaw shana de bai dat ya ai lam nga ai raitim, mungshawa nkau hpe gaw ya du hkra dat ya ai lam nnga shi ai, gara de rim woi mat wa ai hpe nchye lu ai re lam chye lu ai.
Laiwa sai 2024 ning hta mung, Sarmaw Hk.L.Y (105) dap na hpyen hpung ni Jinghpaw ni law malawng nga ai, Hka Nan lawk na mungshawa marai (60) daram hpe rim woi mat ai lam ni mung byin lai wa sai re.
