Pa Kahtawng kaw ramma langai madu hkum madu sat si mat

Sinpraw Ginwang Ginjaw, Mai Ja Yang Muklum makau, Pa Kahtawng hpyen yen dabang kaw ramma langai, madu hkum madu sat si mat ai lam chye lu ai.

July shata 26 ya jahpawt hkying 2:30am grup yin aten daram hta Pa Kahtawng hpyen yen dabang lawk (6) kaw shanu nga ai, Shd. Lan Ta asak (31) ning gaw, nhtu hte du kaw kadoi nna madu hkum madu sat si mat ai lam, lit nga ai salang ni tsun ai.

Ya sat si mat ai ramma wa gaw tsa chyaru lu sha da ai lam mung nnga ai, laiwa sai aten myit ana nga ai sha n-ga, machyi ai mung 10 ya daram na sai re lam chye lu ai.

Laiwa sai aten Sin Lum, Law Dan mare kaw nga lai wa nna, ya aten Pa Kahtawng hpyen yen dabang kaw shanu nga ai, Salang Lasang Ahpu hte Jan Marip Kaw yan a kasha re ai hpe chye lu ai.

Ndai amu mang hkang hte seng nna dabang uphkang salang ni, hpyen yen komiti salang ni, balik dap ni kaw nna lit la jep joi ai lam ni hpe galaw nga ai lam chye lu ai.