Tara rap daw rung hpaw hpawng galaw
Dingda Ginwang Ginjaw, Namhpaka Muklum kata kaw tara rap daw rung hpaw hpawng hte wunli la akyu hpyi hpawng hpe July shata 24 ya shani hkying 10:00am aten hta galaw la lu sai lam chye lu ai.
Hpawng hta Dingda Ginwang Ginjaw, Tara Rap Daw Rung Ningbaw, Dingda Ginwang Ginjaw Uphkang Du, Du Kaba Malang Myu Tsaw kawn shatsam mungga jaw ai hta
“Mungshawa wuhpung wuhpawng kata, dai ni anhte mare buga hpe tara upadi hte makawp maga, shangang shakang ai lai masa htunghking masa ni hpe grau nna gaw gap ra na re, Dai ni anhte Myen mungdan kata kaw gaw, law malawng laknak lang nna makawp maga hkat ai de du taw nga sai ndai grai tsang hpa re, Dai re ai majaw dai ni anhte tara upadi a kata kaw tinang a tara mahkrun, tara wang kata kaw ahkang aya hpe shangang shakang nna shada da makawp maga hkat ai lai ladat hpe grau nna gaw gap sa wa ga ngu nna aja awa tsun mayu ai” nga nna tsun ai.
Hpawng hta Magam Dap, Makan Dap hkan na myit su du salang ni, nawku hpung woi sara ni, htunghking salang ni, mare lawk kanu kawa mungchying mungshawa ni hte hpu nau rawt malan hpung hpu-awn ni sa du shanglawm ai hte galaw la lu sai lam chye lu ai.
