Manmaw ginra gasat gala majan byin nga
KIA Masat (3) Dap Ba, Manmaw ginra hta gasat gala majan laja lana bai byin nga ai lam chye lu ai.
July shata 30 ya jahpawt hkying 9:00am aten daram kaw nna, Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan laja lana bai byin nga ai lam, lit nga ai salang ni kaw na chye lu ai.
Gumshem Myen hpyen dap kawn, KIA pawng hpawm hpyen hpung ni shara la nga ai de hpyen shamu shamawt htu shadut wa ai majaw, gasat gala majan byin wa ai rai nna, lahkawng maga hpyen masa shaja hkat nga ding yang re ai lam chye lu ai.
Manmaw ginra hta KIA pawng hpawm hpyen hpung ni hte gumshem Myen hpyen dap ni laiwa sai 2024 ning December shata praw 4 ya shani kawn gasat gala majan byin wa ai gaw, ya aten laning mi jan sai rai nna, KIA pawng hpawm hpyen hpung ni dap shara law malawng hpe gasat zing madu la lu sai lam nga sai re.
Ya aten gumshem Myen hpyen dap ni gaw Manmaw, Shwegu, Hpakant hte Hkawng Lang Hpu ginra ni de hpyen n-gun, laknak arung arai htaw sa jat bang ai lam galaw nga ai sha n-ga, hpyen shamu shamawt htu shadut ai lam mung ding yang galaw nga ai majaw, gasat gala majan shani shagu ngu na byin nga ai lam matut sagawn chye lu ai.
