Myitkyina Muklum kata lagu lagut myalu myasha ai lam grau sawng wa

Myitkyina Muklum kata hta lagu lagut myalu myasha ai lam, jahkrit shama gumhpraw kashun ai lam, asak nhpring ai jawngma ramma ni ka-ni nang hpam, lu sha dut mari ai lam ni shawoi na hta grau sawng wa nga ai re nga nna, ginra masha ni tsun ai.

Lagu lagut myalu myasha gumhpraw kashun ai lam sawng wa ai gaw, mungmasa hpyen masa lam amyu myu a majaw bungli nlu ai ni law wa ai, ramma nkau ni nang hpam lu sha hpe wanglu wanglang lu sha dut mari jai lang wa ai majaw re nga nna, ginra masha ni matut tsun ai.

Dai hte maren Mogaung hte Monyin Muklum kata ni hta mung, lagu lagut myalu myasha ai lam, gumhpraw kashun ai lam, ka-ni nang hpam lu sha dut mari ai lam lani hte lani grau sawng wa nga ai re hpe chye lu ai.

Ndai zawn byin wa ai lam gaw, gumshem Myen hpyen dap ni mungdan daru magam ahkang aya zing madu kau ai hpang kaw na lani hte grau sawng wa nga ai rai nna, ya na zawn byin nga ai manghkang ni hpe seng ang ai ni kaw nna lit la hparan ya ai lam nnga ai majaw, grau sawng wa nga ai hta dai ginra na mungshawa ni, laiwa laisa mungshawa ni hkrit maja let sha hkawmsa nga ra ai re lam chye lu ai.