Lamung Zup mare kaw Myen hpyen dap ni laja lana sawk jep nga
Myitkyina, Sumpra Bum lam ntsa, Lamung Zup mare shagyit kaw gumshem Myen hpyen dap ni laja lana sawk jep ai lam galaw nga ai hpe chye lu ai.
Lamung Zup mare shagyit kaw ndai laman gumshem Myen hpyen dap ni laiwa laisa mungshawa ni a phone, cycle, mungchying masat ni hpe laiwa sai aten na hta grau laja lana sawk jep nga ai lam, ginra masha ni tsun ai.
Shawoi hkan gaw ntsen nhten ai zawn re ni hpe sha sawk jep ai lam galaw ai, ya gaw laiwa laisa mungshawa ni yawng hpe laja lana sawk jep nga ai, Lamung Zup mare rai ndu shi ai kaw na lam ntsa ding yang gumshem Myen hpyen dap ni shara la shamu shamawt ai lam ni galaw nga ai, nga nna ginra masha ni matut tsun ai.
Laiwa sai August shata praw 4 ya shani hta mung, Alam sa lam kaw gumshem Myen hpyen dap ni laiwa laisa mungshawa ni a phone sawk jep ai hta mungshawa marai (4) hpe rim woi mat wa ai lam chye lu ai.
Ya aten Lamung Zup hte Tang Hpre shagyit ni hta gumshem Myen hpyen dap ni laiwa laisa mungshawa ni hpe laja lana sawk jep ai lam, gumhpraw hta sha ai lam ni galaw nga ai majaw, hkrun lam hkawm mungshawa ni hte laiwa laisa mungshawa ni hkrit tsang na sha hkawmsa nga ra ai lam chye lu ai.
