(48) ning hpring amyu shayi masat ninghtoi hpawng galaw
Wunpawng Mungdan Shanglawt Amyu Shayi Hpung hpaw ai, (48) ning hpring amyu shayi masat ninghtoi hpawng hpe Nmau Ginwang Ginjaw, Man Wing mare htunghking gawknu kaw August shata 19 ya jahpawt hkying 10:00am aten, galaw ai re lam chye lu ai.
Hpawng hta Wunpawng Mungdan Shanglawt Amyu Shayi Hpung hpaw ai, (48) ning hpring amyu shayi masat ninghtoi mungga hti ndau ai lam, Salang Kaba Mahka Gam Awng (A.Div.O Adm NMGG) kaw nna, hpaji jaw mungga shaga ai re lam, ginra masha langai tsun ai.
Wunpawn Mungdan Shanglawt Amyu Shayi Hpung hpaw ai (48) ning hpring sai hpe chyeju shakawn ai lam, amyu shayi hpung ginjaw komiti hta woi awn nga ai ningbaw hte komiti yawng a matu, Nmau Ginwang Ginjaw amyu shayi hpung komiti kata Ginwang, Ginwang Daw, Ninghtawn, Mare, tsang hte tsang magam gun nga ai amyu shayi komiti yawng hte amyu shayi ni yawng a matu akyu hpyi ya ai lam galaw ai re.
Nmau Ginwang Ginjaw kata na ma shapan jawng yawng (17) hta sharin hkamla nga ai jawngma yawng hte saranum ni yawng a matu, Nmau Ginwang Ginjaw komiti yawng a matu, shawnglam hta shakut shaja nga ai share ninghkring ni yawng a matu, gaw ningja ni yawng a matut hte hkala nba hkrum nna tsi rung tsi jaw gawk hkan tsi tsi hkamla nga ai share ninghkring ni yawng a matu akyu hpyi ya ai lam galaw ai hpe chye lu ai.
Dai ni na hpawng hta laksan Man Wing mare amyu shayi komiti hpaw ai lam, laiwa sai aten amyu shayi komiti magam gun u-sa ni hte amyu shayi pati magam bungli hta shaning (10) ning hpring sai magam gun ni hpe kumhpa shagrau ai lam ni galaw ai rai nna, mungshawa yawng 200 jan sa du shanglawm ai hte galaw la lu sai re lam chye lu ai.
Wunpawng Mungdan Shanglawt Amyu Shayi Hpung hpe laiwa sai, 1978 ning August shata (19) ya shani, Pajau Shalawt Yang ngu ai shara kaw Wunpawng Mungdan Shanglawt Hpung kaw nna hpaw masat shagrin da sai hta 2026 ning August shata (19) ya shani hta gaw, (48) ning hpring sai rai nna, (48) ning hpring amyu shayi masat ninghtoi hpawng hpe Ginjaw Ginra, Ginwang Ginjaw shagu hta mung galaw ai re lam matut sagawn chye lu ai.
