Hpung pati hte seng ai hkaw tsun hpawng galaw
Hpung pati shamu shamawt komiti salang ni kaw nna, hpung pati hte seng ai hkaw tsun hpawng hpe Laiza kaw galaw ai lam chye lu ai.
August shata 17 ya shani hpung pati shamu shamawt komiti salang ni Laiza lahta tsang jawng hte lapran tsang jawng na jawngma sara/num ni hpe hpung pati hte seng nna hkaw tsun hpawng galaw ai re lam, jawng komiti ni kaw na chye lu ai.
Hkaw tsun hpawng hta Sara Kaba Sumlut Gam (Tingnyang Up Malai II), Salang Kaba Doi Pyi Sa (Ningtau Ninggawn Amu Madu) hte Du Kaba Maran Zau La (Ninggawn Daju Pati Komiti Amu Madu) ni kaw nna sa du hkaw tsun sanglang dan ai re lam chye lu ai.
Sara Kaba Sumlut Gam (Tingnyang Up Malai II) kaw nna, jawngma ni hte magam gun sara/num ni hpe hpaji lam hta mung ningtawn ai hte KIO a lam ni hpe hkaja nhtawm, mungdan magam bungli lam ni hta kang kang ka ka gun hpai sa wa lu ai ni byin tai na hpe myit mada ai lam tsun n-gun jaw, hpaji jaw shatsam ai lam galaw ai re.
Hpang hta KIO a gaw da ai tara, hpung pati hte seng ai lam ni hpe hkaw tsun sanglang dan ai rai nna, jawngma ni hte sara/num ni kaw nna nchye na nhkawn hkrang ai lam ni hpe san, htai ai lamang ni hpe galaw ai re lam chye lu ai.
