KIA Masat 8 Dap Ba hte Masat 11 Dap Ba ginra hta gumshem Myen hpyen dap ni nbungli hte gap gasat
KIA Masat 8 Dap Ba, Masat 5 Dap Dung ginra, Chyauk Talung mare hte Sin Dat mare hta gumshem Myen hpyen dap ni Jet nbungli hte bawm wa jahkrat gasat ai lam chye lu ai.
Gumshem Myen hpyen dap ni August shata 20 ya jahpawt hkying 9:52am aten hta Chyauk Talung mare kaw nbungli bawm 1, hkying 10:00am aten hta Si Dat mare kaw bawm 3 wa gap gasat ai lam, shawng lam na lit nga ai salang ni kaw na chye lu ai.
Ndai shara kaw gasat gala majan byin ai lam gaw nnga ai raitim, Myen hpyen dap ni da sang wa gap gasat masa re, masha hkra hkala ai gaw nnga ai lam, ginra masha ni tsun ai.
KIA Masat 11 Dap Ba, Masat 12 Dap Dung ginra, Shwegu makau Sintat mare grup yin hte Shwegu Toonship, Mawlamyine lawk shara ni hta mung, gumshem Myen hpyen dap ni Jet nbungli hte bawm wa gap gasat ai hta Mawlamyine lawk na mungshawa marai 7 hkala hkrum ai rai nna, dum nta 3 mung hten za mat ai lam, ginra masha ni kaw na chye lu ai.
August shata 21 ya shani ka-ang hkying 12:26pm aten kawn hkying 12:48pm aten laman hta mung, Shwegu grup yin shara ni hta gumshem Myen hpyen dap ni Jet nbungli 4 hte bawm wa jahkrat gasat kau da ai lam, shawng lam na lit nga ai salang ni kaw na chye lu ai.
Dai ni August shata 21 ya shani kaw nna, gumshem Myen hpyen dap ni Mandalay Gawwun sanghpaw daru kawn sanghpaw 36 lung wa ai hta 7 gaw, hpyen sanghpaw rai nna, Jinghpaw Mung de man yawng lung wa taw ai lam, lit nga ai salang ni kaw na chye lu ai.
