Gumshem Myen hpyen hka sanghpaw hpung ni, Shwegu Muklum de du shang
Katha Muklum kaw nna, Mali Hka ding yang lung wa ai gumshem Myen hpyen hka sanghpaw hpung ni, August shata 27 hte 28 ya shani hta Shwegu Muklum de sanghpaw (14) du shang sai lam chye lu ai.
Mandalay Gawwun sanghpaw daru kaw nna, August shata 21 ya shani Jinghpaw Mung de nnan lung wa ai sanghpaw yawng 15 hta Mandalay hte Katha lapran kaw ginra makawp hpyen hpung PDF ni suicide drone hte hkap gap gasat ai hta sanghpaw (1) hten mat nna, Katha kaw jahkring kau da ma ai lam, ginra masha ni kaw na chye lu ai.
Katha hte Shwegu lam lapran hta mung, KIA pawng hpawm hpyen hpung ni laja lana hkap shingla gasat ai hta sanghpaw nkau loili hten ai lam nga ai raitim sanghpaw (14) yawng, Shwegu kaw du shang sai rai nna, sanghpaw nkau kaw na hpyen lang arung arai machyu pala ni hpe Shwegu Hk.L.Y (56) dap de htaw bang nga ai lam, shawnglam shiga lawk kaw na chye lu ai.
Ndai hka sanghpaw hpung ni lung wa ai lam ding yang hta Y-12 nbungli Jet nbungli ni hte nhkring nsa shimlam la, bawm jahkrat gasat ai rai nna, lagaw lam hku shimlam la shamu shamawt wa ai gumshem Myen hpyen hpung ni hte KIA pawng hpawm hpyen hpung ni laja lana gasat poi byin ai lam chye lu ai.
